Scho glii isch äs so wiit: äs isch wieder Burditräger- und Wildhäiwer-Ziit! Am 23. und 24. Juni diod dLandjugend Sarneraatal fäschtä, wiä immer im Fliähli-Ranft OW, hoffentlich wieder mid ä huifä Gäschtä!

Am Samstig Abä isch der beliäbti Wildhäiwerball, da gaht de Poscht ab, uf jedä Fall! Im Fäschtzält chamä eppis ässä, trinkä oder eifach gmiätlich zämä sitzä, oder uf der Tanzbiihni zu där Muisig vo dä TYROS tanzä und schwitzä! Im Wildhäiwerschopf diod «Wilti-Gruess» fir gioti Stimmig sorgä, äs cha tanzed, gsungä und gjuitzed wärdä bis am Morgä! Natirlich darf oi das Jahr diä grossi Wildhäiwerbar nid fählä, iisä DJ Urs diod dert wieder diä richtig Muisig uiswählä!

Am Sunntig chamä sich bim Burditrägä mässä, und d’Nachwehä vo där lengä Nacht diod mä de sicher gleitig vergässä! Im decktä Zioschoiwerruim chamä das ganzä Spektakel bestuinä und a dä Läifer ganz fescht drickä d’Duimä! Oi ä Wettbewärb mid attraktivä Priisä diänd miär duräfiährä, där Antworttalon miosch eifach am Sunntig bis am drii id Urnä inä riärä.

S’OK isch mid Hochtuirä am vorbereitä und diod voller Elan erledigä diä afalländä Arbeitä. Miär fräiid iis meglichst ä huifä vo iich derfä z’begriässä und zwee unvergässlichi Täg mid iich z’gniässä! Wenn dui dich nu chli gneewer wettisch informiärä, dio doch eifach iisi Homepage www.landjugend.ch/ow studiärä!