Europapark

D Landjugend Werdeberg im Europapark

Mir sin uf di viertel vor 5i am morge mit em Auto uf Rorschach an Bahnhof gfahre und hend döt mit e paar anderne Landjügler uf de Car gwartet. In Waldstatt sin denn au Kamörler dezue cho, und denn isches zimli lustig worde.

Endli simmer denn im Europapark ahcho und sin sofort ind Eurosat (di gross Chugle) döt het di ganz Truppe ahgfange alli mögliche Lieder singe und jodle. Eimol simmer au ufe Wasserbahn und pflutschnass wieder ussicho, zum Glück het d’ Sunne üs recht schnell wieder tröchnet. Insgesamt hemmer nur 4-5 Bahne bewältigt, well ma immer ungefähr e Stund het müsse ahstoh. Bier hole goht schneller - also simmer z'Skandinavie ime Biergarte ghocket und hend de Nomitag gosse.

Ziit isch schnell umi und i ha gwüsst zum usicho bruchen mer mindestens e Halb Stund, und das hemmer gad no gschafft. Isch no schwer gsi alli 15 zämeztrummle aber am End sind denn alli im Schnellschritt zum Usgang. De Car wär anart scho abgfahre. Komischerwis sind alli ufm Gruppefoti ussert Landjugend Werdeberg und en Teil vo de LJ Kamor.

Uf de Heireis sind alli müed gsi, teils sinds am schlofe gsi und anderi halt wieder am umeblödle. De Heiweg isch mer viel schneller vorcho, und scho simmer wieder z’ Rorschach gsi und i han alli wieder heil heibrocht.