Jahres Bericht 2009
Jahresbericht des Präsidenten 09/ 10
We ai diä Zeit vergad, äs isch doch scho wider äs Jahr verbey. Bereits scho 39. Jahr gid äs eysi Landjugend. Mid äs bar Fotänä und meim Bricht wemmer eich das Vergangini Jahr nu äinisch Presentiärä.
Am 16 Jäner hemer diä 38. GV z z Stans im Oumendhuisli chenä a sägä. zwei neywi Vorstandsmittglieder hemmer derfä uifnä. Dr Curdin und jannie isch das gsi.
Churz druif Hend mier am 6. Febr s Boule derfä asägä. Mier sind mit vile Träfsichere oder ay weniger im Rex une zäme cho. Und hend en gmietliche Abig verbrungä.
S’ Ski – Weekend am 7. und 8. Merz mid dä Jungmanschaft Stans –Oberdorf isch heyr uf em Gumme durägfihärd wordä. Ded isch äs de effektiv ai richdig heimelig wordä. Skifahrer, Snouborder und Schlittler simmer de tobe binenad gsi bi Kaffe, Tee und aj Wey hemers so richtig g`nosse
Schlag uf schlag isch es weyder gangä.
Am 14./15März nur grad es Wuchänänd speter simmer ad DV z Näfels. Mier hend wider viu jungi chenä mit näh mit eys im Car. Mid ämä guetä Fäscht und am Sunntig d Delegierte Versammlig hed nu männge gueti und schlächti erinnerigä. Due hemmer derfä mit freid dr Ueli Niederberger vo der Münchmatt i Schweizerisch Vorstand wellä. Am Abig simmer de oui wider mim Car heil heicho, und d spurä vom Vorabig hed me de nimmä gseh!!
Am Seppitag hemmer einisch me mid dä Uirner Landjugend ä Uisflug gnossä. Ziel isch heyr s`Kölikä zonder Müll Deboni und s`Parplegicker Center z Notwil gsi.
Diä alljährlich Buässfeyr isch heyr einisch me z Beggäriäd i dr Riädlichapälä durägfiärd wordä. Ä schenä schibu jungi und outi Leyt hend a dem 08. April dr Wäg ded anä gfundä. Ä idricklichi feyr hend mier mid der Silvia chenä häufä Gstoutä . Nach dem Kiläbsuäch sind de auy nu ufnä Kaffeerundi im Stärnä Igladä gsi.
Zu eysem Jahreshehepunkt am Wäschpi – Fäscht vom 2. Mai. Da chanich nurnu sägä VOU MÄUCH das isch klar. Ä ganz ä huiffä Leit hend zu eys uf Ämmättä uifä gfundä. Im Fäscht Zäut mit dr Fässler Fuchs isch gsungä und d Tanzed worde, i dr Bar mit am DJ Muiri isch es ay recht ab gangä gstunged fouä isch die gsi . Einisch me isch das Fäscht me oder weniger reibigslos verluffä.. A eych Häufer äs rächdhärzlichs dankäschen, nur dank dem Zämähaut vo eys aunä isch so ebis meglich duräzfiärä.
De isch scho wider s Häufferässä dra gsi. Guäd 40 hend das Znachd im i där Forsthittä z Ouzele chenä gniässä. Ä jedä und äinä hed der abig meh alls verdiänd gha, d muisig Fässler Fuchs womer fir eysi Häufer wider organisierd gha hend. G`Muisig hed nid gherd bevor mier oues zämegruimed gha hend!
Dr Grillabig hed dr 31. Mäi uf eysem Jahresprogramm Platziärd. Da wird definitiv nu mit Härzbluäd Grilliärd. Gmiätili isch äs de gsi i dr Stanserforschd Hittä.
Im Summer gemmer auigs nu äinsch mid dä Landjugend Sarnerrattal gu Wandärä. Am 20. September simmer uifä, richtig Wirzweligrad und nachem haut im Rest. Gumme wider abä. Dure hexe Wäg, da ischs am eint und andere scho nu ä chly gfirchig worde!. Bi Näbu Wätter hemer das Tägli derfä gniäsä.
Viehschau 2009 am 10. Oktober. Mier hennd zämä mit dä Jungzichter dr Zichterabig z Dalläweyl uf Bei gschdeud und durä gfiärd. Sie idr Bar und mier Idr Halle. ,allnä Hällferinnä und Häufer mecht ich nu äinisch rächt härzlich dankä.
De am 06. Novämber hend auy nu äinisch richdig chennä Gas gä. Z Roggwil simmer gu Go – Cart fahrä. Mit erä grosse schar simmer die gross pischte go u sicher mache.
Klausjassen11. Dezämber.
Mit guätä oder haut ai schlächtä Chartä isch eifrig midänand und gägänand Pinkt gsammled wordä. Am ändj vo eysere Jassrundi isch ai heyr dr Samichlais mit seim ghiufmä. zu eys gu innä luägä diä erschdä drei vo dä Fraiä und Mannä hend äinisch me diä grossä Grittibänzä chenä mit häi nä. Und ay a jedem Jasser nu es Chränzli.
De mecht ich a derä Stell aunä wo a eysnä Aläss sich bedäiliged hend rächt härzlich Dankä. Speziell a meynä Vorstandsmittglieder fir der Isatz durs Jahr. Ä Dank a dr Brändle Silvia eysere Präses. Ai i dem Jahr hend au wider viu chenä erläbä.
Das isch dr 39. Jahrespricht vo dr Landjugend Nidwaldä.
Dankä firs zuälosä
19. Januar 2010
Dr Präsidänt
Erich Niederberger